ಸುದ್ಧಿಯಲ್ಲಿ ಏಕಿದೆ? ಸೆಕೆಂಡ್‌ಗೆ 47 ಕಿ. ಮೀ. ವೇಗದಲ್ಲಿ ಸಾಗುವ ಲಿಯೋನಾರ್ಡ್‌ ಎಂಬ ಧೂಮಕೇತು, ಸರಿ ಸುಮಾರು 523 ಶತಕೋಟಿ ಕಿ. ಮೀ. ದೂರದಿಂದ ಭೂಮಿಯ ಬಳಿಗೆ ಬಂದು, ಇದೀಗ ದೂರ ಸರಿಯುತ್ತಿದೆ.

ಮುಖ್ಯಾಂಶಗಳು

• 70 ವರ್ಷಗಳ ಬಳಿಕ ಇದೇ ಮೊದಲ ಬಾರಿಗೆ ಭೂಮಿಗೆ ಇಷ್ಟು ಸಮೀಪ ಬಂದಿದ್ದ ಲಿಯೋನಾರ್ಡ್‌ ಧೂಮಕೇತು, ಭೂಮಿಯಿಂದ 35 ದಶಲಕ್ಷ ಕಿ. ಮೀ. ದೂರದಲ್ಲಿ ಹಾದು ಹೋಗಿದೆ.
• ಈವರೆಗೆ ನಮ್ಮ ಸೌರಮಂಡಲವೊಂದರಲ್ಲೇ 3,700 ಧೂಮಕೇತುಗಳನ್ನು ಗುರ್ತಿಸಲಾಗಿದೆ. ಇದೀಗ ಭೂಮಿಯ ಬಳಿ ಬಂದಿದ್ದ ಲಿಯನಾರ್ಡೋ ಧೂಮಕೇತು ಕೂಡಾ ಸೂರ್ಯನನ್ನು ಸುತ್ತುತ್ತದೆ.
• ಇದು ಸಾಕಷ್ಟು ವರ್ಷಗಳಿಂದ ಭೂಮಿಯ ಮೇಲಿಂದ ಯಾರೊಬ್ಬರಿಗೂ ಕಾಣಿಸದೇ ಸಂಚರಿಸಿದೆ. ಇದರ ಒಡಲಲ್ಲಿ ಘನೀಕೃತ ಕಾರ್ಬನ್-ಡೈ-ಆಕ್ಸೈಡ್, ಸಾರಜನಕ ಮತ್ತು ಕಾರ್ಬನ್ ಮಾನಾಕ್ಸೈಡ್ ಅನ್ನು ಹೊಂದಿದೆ ಎಂದು ಹೇಳಲಾಗುತ್ತಿದೆ. ಭೂಮಿಯ ವಾತಾವರಣವನ್ನು ಬಿಟ್ಟು ಸೂರ್ಯನ ಹತ್ತಿರ ಹೋದಂತೆಲ್ಲಾ ಅದರಲ್ಲಿನ ವಸ್ತುಗಳೆಲ್ಲಾ ಕರಗಿ ಆವಿಯಾಗಿ ಧೂಮಕೇತು ಬಾಲ ತುಂಬಾ ಉದ್ದವಾಗುತ್ತದೆ.
• ಸಾಮಾನ್ಯವಾಗಿ ಧೂಮಕೇತುಗಳು ಉದ್ದವಾದ ಬಾಲವನ್ನು ಹೊಂದಿರುತ್ತವೆ. ಧೂಮಕೇತುವಿನ ಮೂತಿ ಗಟ್ಟಿಯಾಗಿರುತ್ತದೆ. ಇದು ಬಿಳಿ ಬಣ್ಣದಲ್ಲಿದ್ದ ಹೊಳೆಯುತ್ತಿರುತ್ತದೆ. ಘನ ವಸ್ತುವಿನ ರೀತಿ ಕಾಣುವ ಧೂಮಕೇತುವಿನ ಮೂತಿಯ ಹಿಂದೆ ಕಿ. ಮೀ. ಗಟ್ಟಲೆ ಉದ್ದದ ಬಾಲ ಇರುತ್ತದೆ. ಈ ಬಾಲವು ಧೂಳಿನ ಕಣಗಳು ಹಾಗೂ ಕೆಲವೊಮ್ಮೆ ಹಿಮ ಹೊಂದಿರುತ್ತವೆ ಎಂದೂ ಅಂದಾಜಿಸಲಾಗಿದೆ.