ಸುದ್ದಿಯಲ್ಲಿ ಏಕಿದೆ? 2008ರ ನಂತರ ಜನಿಸಿದವರು ಸಿಗರೇಟ್ ಅಥವಾ ತಂಬಾಕು ಉತ್ಪನ್ನಗಳನ್ನು ಖರೀದಿಸುವುದನ್ನು ನಿಷೇಧಿಸುವ ಹೊಸ ಕಾನೂನನ್ನು ಅಂಗೀಕರಿಸಿದ ನ್ಯೂಜಿಲೆಂಡ್‌ನಿಂದ ಪ್ರೇರಿತವಾಗಿರುವ ಕರ್ನಾಟಕ ರಾಜ್ಯ ಆರೋಗ್ಯ ಇಲಾಖೆಯು, 2025 ರ ವೇಳೆಗೆ ತಂಬಾಕು ಮುಕ್ತ ಪೀಳಿಗೆಯನ್ನು (ಜನರೇಷನ್) ರಚಿಸಲು ಇದೇ ಮಾದರಿಯನ್ನು ತರಲು ಮುಂದಾಗಿದೆ. 

ಮುಖ್ಯಾಂಶಗಳು

• ತಂಬಾಕು ಮುಕ್ತ ಪೀಳಿಗೆ ಎನ್ನುವ ವಿನೂತನ ಕಾರ್ಯಕ್ರಮವನ್ನು ದೇಶದಲ್ಲೆ ಮೊದಲು ರಾಜ್ಯದಲ್ಲಿ ಅನುಷ್ಠಾನಗೊಳಿಸಲಾಗುತ್ತಿದೆ
• ನ್ಯೂಜಿಲೆಂಡ್ ಮಾದರಿಯನ್ನು ಅಳವಡಿಸಿಕೊಳ್ಳುವುದರ ಪರಿಣಾಮವಾಗಿ, ವರ್ಷಗಳು ಕಳೆದಂತೆ, ಕಡಿಮೆ ಜನರು ಮಾತ್ರ ತಂಬಾಕು ಖರೀದಿಸಲು ಸಾಧ್ಯವಾಗುತ್ತದೆ ಮತ್ತು ತಂಬಾಕು ಮುಕ್ತ ಪೀಳಿಗೆಗೆ ದಾರಿ ಮಾಡಿಕೊಡುತ್ತದೆ.
• ಆರೋಗ್ಯ ಇಲಾಖೆಯ ವಿಭಾಗವಾದ ರಾಜ್ಯ ತಂಬಾಕು ನಿಯಂತ್ರಣ ಕೋಶವು ಈ ಸಂಬಂಧ ಈಗಾಗಲೇ ಮಾರ್ಗಸೂಚಿಯನ್ನು ಸಿದ್ಧಪಡಿಸಿದೆ. ಅದರ ದೃಷ್ಟಿಯ ಪ್ರಕಾರ, 2007ರಲ್ಲಿ ಮತ್ತು ನಂತರ ಜನಿಸಿದ ಎಲ್ಲರಿಗೂ ಕರ್ನಾಟಕದಾದ್ಯಂತ ಯಾವುದೇ ತಂಬಾಕು ಉತ್ಪನ್ನಗಳಿಗೆ ಪ್ರವೇಶವಿಲ್ಲ.
• ‘ತಂಬಾಕು ಬಳಕೆಗೆ ಕಾನೂನುಬದ್ಧ ವಯಸ್ಸು 18 ವರ್ಷ ಆಗಿದೆ. 2007ರಲ್ಲಿ ಮತ್ತು ನಂತರ ಜನಿಸಿದವರು 2025ರ ವೇಳೆಗೆ 18 ವರ್ಷಗಳನ್ನು ತಲುಪುತ್ತಾರೆ. 18 ವರ್ಷಗಳ ನಂತರವೂ ನಾವು ತಂಬಾಕು ಉತ್ಪನ್ನಗಳ ಬಳಕೆಯನ್ನು ನಿಲ್ಲಿಸುವ ಸಮಾಜವನ್ನು ನಿರ್ಮಿಸಲು ಬಯಸುತ್ತೇವೆ. ಉದಾಹರಣೆಗೆ, 2007ರಲ್ಲಿ ಜನಿಸಿದವರಿಗೆ 2030 ರಲ್ಲಿ 23 ವರ್ಷಗಳಾಗಿರುತ್ತದೆ. ಆದರೆ, ಅವರು ತಂಬಾಕು ಖರೀದಿಸಲು ಸಾಧ್ಯವಿಲ್ಲ. ಹಾಗಾಗಿ ವರ್ಷಗಳು ಕಳೆದಂತೆ ತಂಬಾಕು ಸೇವಿಸುವವರ ಸಂಖ್ಯೆ ಕಡಿಮೆಯಾಗಲಿದೆ’.
• ಆರೋಗ್ಯ ಇಲಾಖೆ ರಾಜ್ಯದಲ್ಲಿ ಇದೀಗ ತಂಬಾಕು ಮುಕ್ತ ಗ್ರಾಮಗಳನ್ನಾಗಿ ನಿರ್ಮಿಸುತ್ತಿದ್ದು, ಈ ಗ್ರಾಮಗಳ ಸಂಖ್ಯೆ 25ಕ್ಕೆ ಏರಿಕೆಯಾಗಿದೆ.

ಉದ್ದೇಶ

• ತಂಬಾಕನ್ನು ಪ್ರಯೋಗಿಸಿ ವ್ಯಸನಕ್ಕೆ ಒಳಗಾಗುವ ಮಕ್ಕಳಿಂದ ಸುಲಭವಾಗಿ ತಂಬಾಕು ಸೇವನೆಯನ್ನು ಕೊನೆಗಾಣಿಸುವುದು ಇದರ ಉದ್ದೇಶವಾಗಿದೆ. ಯುವಕರು ನಮ್ಮ ರಾಷ್ಟ್ರದ ಸಂಪತ್ತು ಮತ್ತು ಈ ತಂಬಾಕು ಮುಕ್ತ ಪೀಳಿಗೆಯ ಕ್ರಮವು ಮಕ್ಕಳಿಗೆ ತಂಬಾಕು ಸುಲಭವಾಗಿ ಲಭ್ಯವಾಗುವ ಮೂಲ ಕಾರಣವನ್ನು ತಪ್ಪಿಸುತ್ತದೆ.

ಸಮೀಕ್ಷೆಯಲ್ಲಿ ಕರ್ನಾಟಕದ  ಚಿತ್ರಣ

• ‘ಬಹುಪಾಲು ತಂಬಾಕು-ಬಳಕೆದಾರರು ತಮ್ಮ ಬಾಲ್ಯ ಮತ್ತು ಹದಿಹರೆಯದಲ್ಲಿ ಅಭ್ಯಾಸವನ್ನು ಮಾಡಿಕೊಳ್ಳುತ್ತಾರೆ. ಜಾಗತಿಕ ವಯಸ್ಕರ ತಂಬಾಕು ಸಮೀಕ್ಷೆ 2 ರ ಪ್ರಕಾರ, ಕರ್ನಾಟಕದ 7 ಕೋಟಿ ಜನಸಂಖ್ಯೆಯ ಪೈಕಿ ಶೇ 22.8 ವಯಸ್ಕರು ಅಂದರೆ ಸುಮಾರು 2.5 ರಿಂದ 3 ಕೋಟಿ ಮಂದಿ ತಂಬಾಕು ಉತ್ಪನ್ನಗಳನ್ನು ಬಳಸುತ್ತಿದ್ದಾರೆ. ಈ ಶೇ. 22.8% ವಯಸ್ಕರ ಪೈಕಿ, ಶೇ. 8.8 ಮಂದಿ ಧೂಮಪಾನಿಗಳು (ಬೀಡಿ, ಸಿಗರೇಟು, ಹುಕ್ಕಾ… ಬಳಕೆದಾರರು) ಮತ್ತು ಶೇ 16.3 ಮಂದಿ ಧೂಮಪಾನರಹಿತ ತಂಬಾಕು (ಹೊಗೆಸೊಪ್ಪು, ಜರ್ದಾ, ಬೀಡಾ, ಪಾನ್‌ಮಸಾಲಾದೊಂದಿಗಿನ ತಂಬಾಕು…) ಉತ್ಪನ್ನಗಳನ್ನು ಬಳಸುತ್ತಿದ್ದಾರೆ. ಈ ಯುವಕರಲ್ಲಿ ಹೆಚ್ಚಿನವರು ಸುಮಾರು 15 ವರ್ಷದ ವಯೋಮಾನದಲ್ಲೇ ತಂಬಾಕು ಬಳಕೆದಾರರಾಗಿದ್ದಾರೆ. ತಂಬಾಕು ಚಟಕ್ಕೆ ಸಿಲುಕಿದ ನಂತರ ಶೇ 6 ರಷ್ಟು ಜನ ಮಾತ್ರ ತಂಬಾಕು ಬಳಕೆಯಿಂದ ಹೊರ ಬರುತ್ತಿದ್ದಾರೆ.
• ಸ್ಟಾಪ್ ಟೊಬ್ಯಾಕೋ ಮೊಬೈಲ್ ಆಪ್: ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸೇವೆಗಳು ಮತ್ತು ರಾಜ್ಯ ತಂಬಾಕು ನಿಯಂತ್ರಣ ಘಟಕ, ಮೀಡಿಯಾ ಅಲೂಮ್ನಿ ಅಸೋಸಿಯೇಷನ್ ಮಂಗಳಗಂಗೋತ್ರಿಯ ಸಹಯೋಗದಲ್ಲಿ ಆಪ್ ಬಿಡುಗಡೆ ಮಾಡಲಾಗಿದೆ.