ಸುದ್ದಿಯಲ್ಲಿ ಏಕಿದೆ? ಪಾಕ್ ಆಕ್ರಮಿತ ಕಾಶ್ಮೀರದ (ಪಿಒಕೆ) ಪ್ರಮುಖ ಆಯಕಟ್ಟಿನ ಭಾಗವಾಗಿರುವ ಶಕ್ಸ್‌ಗಾಮ್ ಕಣಿವೆಯಲ್ಲಿ ಚೀನಾ ಕೈಗೊಂಡಿರುವ ನಿರ್ಮಾಣ ಕಾಮಗಾರಿಯು ಕಾನೂನುಬಾಹಿರವಾದದ್ದಾಗಿದೆ ಎಂದು ಭಾರತವು ಚೀನಾ ಬಳಿ ಪ್ರಬಲವಾಗಿ ಪ್ರತಿಭಟನೆ ನಡೆಸಿದೆ.

ಮುಖ್ಯಾಂಶಗಳು

• ಅಘಿಲ್ ಪಾಸ್ ಬಳಿ ಚೀನಾದ ರಸ್ತೆ ನಿರ್ಮಾಣ ಪ್ರಗತಿಯು, ಸಿಯಾಚಿನ್ ಗ್ಲೇಸಿಯರ್ ಪ್ರದೇಶದಲ್ಲಿ ಆತಂಕವನ್ನು ಹೆಚ್ಚಿಸುತ್ತಿದೆ
• ಇತ್ತೀಚಿನ ಉಪಗ್ರಹ ಚಿತ್ರಗಳು ಚೀನಾದ ರಸ್ತೆಯು ಅಘಿಲ್ ಪಾಸ್ ಅನ್ನು ಸಮೀಪಿಸುತ್ತಿರುವುದನ್ನು ತೋರಿಸಿದೆ, ಸಿಯಾಚಿನ್ ಗ್ಲೇಸಿಯರ್‌ನ ಉತ್ತರ ಭಾಗದ ಕಡೆಗೆ ನಿರ್ಮಾಣ ಪುನರಾರಂಭವಾಗಿದೆ.

ಅಘಿಲ್ ಪಾಸ್:

• ಇದು ಕಾರಕೋರಂನಲ್ಲಿರುವ ಮೌಂಟ್ ಗಾಡ್ವಿನ್-ಆಸ್ಟೆನ್‌ ಪರ್ವತದ ಉತ್ತರಕ್ಕೆ ನೆಲೆಗೊಂಡಿದೆ.
• ಇದು ಲಡಾಖ್ ಅನ್ನು ಚೀನಾದ ಕ್ಸಿನ್‌ಜಿಯಾಂಗ್ ಪ್ರಾಂತ್ಯದೊಂದಿಗೆ ಸಂಪರ್ಕಿಸುತ್ತದೆ.
• ಚೀನಾವು ಸೆಪ್ಟೆಂಬರ್ 2017 ಮತ್ತು ಫೆಬ್ರವರಿ 2018 ರ ನಡುವೆ ಸುಮಾರು 5,163 ಚದರ ಕಿಲೋಮೀಟರ್ ವಿಸ್ತೀರ್ಣದ ಶಕ್ಸ್‌ಗಾಮ್ ಕಣಿವೆಯಲ್ಲಿ ಸುಮಾರು 70 ಕಿಮೀ ಮೆಟಲ್ ರಸ್ತೆಯನ್ನು ನಿರ್ಮಿಸಿದೆ ಎಂದು ವರದಿಯಾಗಿದೆ.

ಶಕ್ಸ್‌ಗಾಮ್ ಕಣಿವೆಯ ಬಗ್ಗೆ

ಶಕ್ಸ್‌ಗಾಮ್ ಕಣಿವೆ, ಟ್ರಾನ್ಸ್-ಕಾರಕೋರಂ ಪ್ರದೇಶವಾಗಿದೆ, ಇದು ಪಾಕ್ ಆಕ್ರಮಿತ ಕಾಶ್ಮೀರದ (PoK) ಭಾಗವಾಗಿರುವ ಆಯಕಟ್ಟಿನ ಪ್ರಮುಖ ಪ್ರದೇಶವಾಗಿದೆ. ಇದನ್ನು ಭಾರತ-ಚೀನಾ ಯುದ್ಧದ ಒಂದು ವರ್ಷದ ನಂತರ 1963 ರಲ್ಲಿ ಪಾಕಿಸ್ತಾನವು ಚೀನಾಕ್ಕೆ ಬಿಟ್ಟುಕೊಟ್ಟಿತು.

ಭಾರತದ ನಿಲುವು: ಕಣಿವೆಯು ಭಾರತದ ಭಾಗವಾಗಿದೆ. 1963ರ ಚೀನಾ–ಪಾಕಿಸ್ತಾನ ಗಡಿ ಒಪ್ಪಂದವನ್ನು ಭಾರತ ಎಂದಿಗೂ ಒಪ್ಪಿಕೊಂಡಿಲ್ಲ. ಈ ಒಪ್ಪಂದದ ಮೂಲಕ ಪಾಕಿಸ್ತಾನ ಈ ಪ್ರದೇಶವನ್ನು ಕಾನೂನುಬಾಹಿರವಾಗಿ ಚೀನಾ ದೇಶಕ್ಕೆ ಬಿಟ್ಟುಕೊಡಲು ಪ್ರಯತ್ನಿಸಿದೆ’ ಎಂದು ಹೇಳಿದೆ.