ಸುದ್ಧಿಯಲ್ಲಿ ಏಕಿದೆ ?  ರಾಜ್ಯದಲ್ಲಿ 2019ರ ಮಾರ್ಚ್ 31ಕ್ಕಿಂತ ಪೂರ್ವದಲ್ಲಿ ನೋಂದಾಯಿಸಲಾಗಿರುವ ಎಲ್ಲ ಮಾದರಿಯ ವಾಹನಗಳಿಗೆ ‘ಅತಿ ಸುರಕ್ಷಿತ ನೋಂದಣಿ ಫಲಕ’ಗಳ (ಹೈ ಸೆಕ್ಯುರಿಟಿ ರಿಜಿಸ್ಪ್ರೇಷನ್‌ ಪ್ಲೇಟ್‌- ಎಚ್‌ಎಸ್‌ಆರ್‌ಪಿ) ಅಳವಡಿಕೆ ಕಡ್ಡಾಯಗೊಳಿಸಲಾಗಿದೆ.

ಮುಖ್ಯ ಅಂಶಗಳು

• ಅತಿ ಸುರಕ್ಷಿತ ನೋಂದಣಿ ಫಲಕಗಳನ್ನು ಅಳವಡಿಸುವ ಗುತ್ತಿಗೆ ಪಡೆದ ಏಜೆನ್ಸಿಯು ಕಾರ್ಯಾದೇಶ ಪಡೆದ ಮೂರು ತಿಂಗಳೊಳಗೆ ಎಂಬೋಸಿಂಗ್‌ (ಉಬ್ಬು) ಮತ್ತು ಫಲಕ ತಯಾರಿಕೆ ಘಟಕವನ್ನು ರಾಜ್ಯದಲ್ಲೇ ಸ್ಥಾಪಿಸಬೇಕಾಗುತ್ತದೆ. ಪ್ರತಿಯೊಂದು ಜಿಲ್ಲೆಯಲ್ಲೂ ಎಂಬೋಸಿಂಗ್‌ ಸ್ಟೇಷನ್‌ ನಿರ್ಮಿಸಬೇಕಾಗುತ್ತದೆ. ಹಾಗೆಯೇ, ಫಲಕ ಅಳವಡಿಕೆಯ ಸ್ಟೇಷನ್‌ಗಳನ್ನು ಆಯಾ ಪ್ರಾದೇಶಿಕ ಸಾರಿಗೆ ಕಚೇರಿಗಳ ವ್ಯಾಪ್ತಿಯಲ್ಲಿಯೇ ಸ್ಥಾಪನೆ ಮಾಡಬೇಕಾಗುತ್ತದೆ.
• ವಾಹನ ಮಾಲೀಕರು ಆನ್‌ಲೈನ್‌ನಲ್ಲಿಯೇ ಎಚ್‌ಎಸ್‌ಆರ್‌ಪಿಗಾಗಿ ಬುಕ್ಕಿಂಗ್‌ ಮಾಡಿಕೊಳ್ಳಲು ಹಾಗೂ ಮನೆ ಬಾಗಿಲಲ್ಲೇ ಫಲಕ ಅಳವಡಿಸಿಕೊಳ್ಳಲು ಅವಕಾಶವಿರುತ್ತದೆ. ಗುತ್ತಿಗೆ ಏಜೆನ್ಸಿಯು ಸಾರಿಗೆ ಇಲಾಖೆಯೊಂದಿಗೆ ಮಾಡಿಕೊಂಡ ಒಡಂಬಡಿಕೆಯು ಮೂರು ವರ್ಷ ಚಾಲ್ತಿಯಲ್ಲಿರುತ್ತದೆ. ಪ್ರತಿಯೊಂದು ಎಚ್‌ಎಸ್‌ಆರ್‌ಪಿ ಫಲಕ ಅಳವಡಿಕೆಗೆ ಗುತ್ತಿಗೆ ಏಜೆನ್ಸಿ ಸಂಗ್ರಹಿಸುವ ಶುಲ್ಕದಲ್ಲಿ ಶೇ. 2ರಷ್ಟು ರಾಯಧನವನ್ನು ಸಾರಿಗೆ ಇಲಾಖೆಗೆ ಪಾವತಿಸಲಿದೆ.

ಈ ವ್ಯವಸ್ಥೆ ಬೇರೆ ಎಲ್ಲಿ ಜಾರಿಯಲ್ಲಿದೆ ?

• ಸದ್ಯ ಉತ್ತರ ಪ್ರದೇಶ, ಹೊಸದಿಲ್ಲಿ ಮತ್ತು ಒಡಿಶಾದಲ್ಲಿ ಹೊಸ ವ್ಯವಸ್ಥೆ ಜಾರಿಗೆ ಬಂದಿದೆ.

ಎಚ್‌ಎಸ್‌ಆರ್‌ಪಿ ವಿಶೇಷತೆ ಏನು?

• ಹೊಸ ಮಾದರಿಯ ನಂಬರ್‌ ಪ್ಲೇಟ್‌ಗಳು ಹೆಚ್ಚು ಸುರಕ್ಷಿತ
• ಪ್ರತಿ ವಾಹನದ ಎಚ್‌ಎಸ್‌ಆರ್‌ಪಿಗೂ ಪ್ರತ್ಯೇಕ ವಿಶಿಷ್ಟ ಗುರುತಿನ ಸಂಖ್ಯೆ ನೀಡಲಾಗುತ್ತದೆ. ಇದನ್ನು ಸಾರಿಗೆ ಇಲಾಖೆಯಲ್ಲಿ ನೋಂದಣಿ ಮಾಡಲಾಗಿರುತ್ತದೆ.
• ಒಂದೇ ನೋಂದಣಿ ಸಂಖ್ಯೆಯಲ್ಲಿ ಎರಡು ವಾಹನಗಳಿಗೆ ಎಚ್‌ಎಸ್‌ಆರ್‌ಪಿ ಪಡೆಯಲು ಸಾಧ್ಯವೇ ಇಲ್ಲ.
• ದ್ವಿಚಕ್ರ ವಾಹನಗಳಿಗೆ ಪ್ರತ್ಯೇಕ ಕೋಡ್‌ ಸೃಷ್ಟಿಸಲಾಗಿರುತ್ತದೆ.
• ರಿಜಿಸ್ಪ್ರೇಷನ್‌ ಪ್ಲೇಟ್‌ ವಾಹನದ ಮುಂಬದಿ ಮತ್ತು ಹಿಂಬದಿಯಲ್ಲಿ ಮಾತ್ರ ಅಳವಡಿಕೆ.
• ತ್ರಿಚಕ್ರ, ನಾಲ್ಕು ಚಕ್ರ ಸೇರಿದಂತೆ ಎಲ್ಲ ಮಾದರಿಯ ವಾಹನಗಳಿಗೆ ಮುಂಬದಿ ಗಾಜಿನ ಒಳಭಾಗದಲ್ಲಿ 10 ಡಿಜಿಟಲ್‌ನ ವಿಶಿಷ್ಟ ಗುರುತಿನ ಸಂಖ್ಯೆಯ ಸ್ಟಿಕ್ಕರ್‌ ಅಂಟಿಸಲಾಗುತ್ತದೆ.
• ಇದರಲ್ಲಿ ವಾಹನದ ಎಂಜಿನ್‌ ಸಂಖ್ಯೆ, ಚಾಸಿಸ್‌, ನೋಂದಣಿ ಸಂಖ್ಯೆ, ವಾಹನದ ಮಾದರಿ, ಮಾಲೀಕರ ವಿವರ ಸೇರಿದಂತೆ ಸಂಪೂರ್ಣ ಮಾಹಿತಿ ಅಡಕವಾಗಿರುತ್ತದೆ.
• ಈ ಸಂಖ್ಯೆಯನ್ನು ಲೇಸರ್‌ ತಂತ್ರಜ್ಞಾನದಲ್ಲಿ ಮುದ್ರಿಸಿರುವುದರಿಂದ ಅಳಿಸಲು ಆಗುವುದಿಲ್ಲ.
• ಹಳೆಯ ಕಾರುಗಳನ್ನು ಕೊಳ್ಳುವಾಗ ಈ ಸಂಖ್ಯೆಯನ್ನು ಪರಿಶೀಲಿಸಿದರೆ, ಅದು ಅದೇ ವಾಹನದ್ದೇ ಅಥವಾ ಇಲ್ಲವೇ ಎಂಬುದು ಗೊತ್ತಾಗುತ್ತದೆ.
• ಕದ್ದ ವಾಹನದ ನಂಬರ್‌ ಪ್ಲೇಟ್‌ ಬದಲಿಸಿ, ಮಾರಾಟ ಮಾಡಲು ಸಾಧ್ಯವಿಲ್ಲ. ಇದರಿಂದ ಕಳ್ಳತನಕ್ಕೆ ಕಡಿವಾಣ ಬೀಳಲಿದೆ.
• ಸ್ಟಿಕ್ಕರ್‌ ಅನ್ನು ಒಂದೊಮ್ಮೆ ತೆಗೆದರೆ ಮತ್ತೆ ಅಂಟಿಸಲಾಗದು. ಮುದ್ರಿತ ಅಕ್ಷರಗಳು ಗಾಜಿಗೆ ಅಂಟಿಕೊಂಡಿರುತ್ತವೆ.