ಸುದ್ದಿಯಲ್ಲಿ  ಏಕಿದೆ? 2023 ಜೂನ್ 1ರಿಂದ ರಫ್ತಾಗುವ ಎಲ್ಲ ಕೆಮ್ಮಿನ ಸಿರಪ್‌ಗಳನ್ನೂ ಸರ್ಕಾರದ ಅಧಿಕೃತ ಲ್ಯಾಬ್‌ಗಳಲ್ಲಿ ಪರೀಕ್ಷೆಗೆ ಒಳಪಡಿಸಬೇಕು ಎಂದು ಕಂಪೆನಿಗಳಿಗೆ ಕೇಂದ್ರ ಸರ್ಕಾರ  ಸೂಚನೆ ನೀಡಿದೆ.

ಮುಖ್ಯಾಂಶಗಳು 

• ಕೆಮ್ಮಿನ ಸಿರಪ್ ರಫ್ತುದಾರರು ತಮ್ಮ ಉತ್ಪನ್ನಗಳನ್ನು ವಿದೇಶಗಳಿಗೆ ಕಳುಹಿಸಲು ಶಿಪ್‌ಮೆಂಟ್ ಮಾಡುವುದಕ್ಕೂ ಮುನ್ನ ಅನುಮೋದನೆ ಪಡೆಯಲು ನಿರ್ದಿಷ್ಟ ಸರ್ಕಾರಿ ಲ್ಯಾಬೊರೇಟರಿಗಳಲ್ಲಿ ಅವುಗಳನ್ನು ಪರೀಕ್ಷೆಗೆ ಒಳಪಡಿಸುವುದು ಕಡ್ಡಾಯವಾಗಲಿದೆ.
• “ಕೆಮ್ಮಿನ ಸಿರಪ್‌ಗಳ ರಫ್ತು ನಡೆಸಲು, ಜೂನ್ 1, 2023ರಿಂದ ಅನ್ವಯವಾಗುವಂತೆ ಯಾವುದೇ ಪ್ರಯೋಗಾಲಯ ಹೊರಡಿಸುವ ವಿಶ್ಲೇಷಣಾ ಪ್ರಮಾಣಪತ್ರದೊಂದಿಗೆ ರಫ್ತು ಮಾದರಿಗಳ ಪರೀಕ್ಷೆಯ ಆಧಾರದಲ್ಲಿ ಅನುಮತಿ ನೀಡಲಾಗುತ್ತದೆ” ಎಂದು ವಿದೇಶಿ ವ್ಯಾಪಾರ ಪ್ರಧಾನ ನಿರ್ದೇಶನಾಲಯ (DGFT) ಅಧಿಸೂಚನೆಯಲ್ಲಿ ತಿಳಿಸಿದೆ.

ಕಾರಣ:  ಭಾರತೀಯ ಕಂಪೆನಿಗಳಿಂದ ಪೂರೈಕೆಯಾದ ಕೆಮ್ಮಿನ ಔಷಧಗಳು ವಿವಿಧ ದೇಶಗಳಲ್ಲಿ ಮಕ್ಕಳ ಸಾವು ಹಾಗೂ ಅನಾರೋಗ್ಯಕ್ಕೆ ಕಾರಣವಾಗಿರುವ ವರದಿಗಳು ಜಾಗತಿಕ ಮಟ್ಟದಲ್ಲಿ ಗುಣಮಟ್ಟದ ಕುರಿತಾದ ಕಳವಳ ಮೂಡಿಸಿರುವ ಸಂದರ್ಭದಲ್ಲಿ ಕೇಂದ್ರದ ಈ ಸೂಚನೆ ಹೊರಬಂದಿದೆ.

ಉದ್ದೇಶ

• ಕೆಮ್ಮಿನ ಔಷಧಗಳ ಮೇಲೆ ಬಂದಿರುವ ಕಳಂಕವನ್ನು ತೊಲಗಿಸಿ, ಗುಣಮಟ್ಟದ ಸಿರಪ್‌ಗಳನ್ನು ಜಾಗತಿಕ ಮಾರುಕಟ್ಟೆಗೆ ರಫ್ತು ಮಾಡುವ ಉದ್ದೇಶದೊಂದಿಗೆ ಕೇಂದ್ರ ಸರ್ಕಾರ ಹೊಸ ನಿಯಮ ಜಾರಿಗೆ ತಂದಿದೆ.
• ಭಾರತದಿಂದ ರಫ್ತಾಗುವ ವಿವಿಧ ಔಷಧ ಉತ್ಪನ್ನಗಳ ಗುಣಮಟ್ಟದ ಬಗ್ಗೆ ಭರವಸೆ ಮೂಡಿಸುವ ಭಾರತದ ಬದ್ಧತೆಯನ್ನು ಮರು ಸ್ಥಾಪಿಸಲು ಕೇಂದ್ರ ಸರ್ಕಾರವು ಕೆಮ್ಮಿನ ಸಿರಪ್‌ಗಳನ್ನು ರಫ್ತು ಮಾಡುವುದಕ್ಕೂ ಮುನ್ನ ಗುಣಮಟ್ಟ ಪರೀಕ್ಷೆಯ ಪ್ರಕ್ರಿಯೆ ಆರಂಭಿಸಲು ನಿರ್ಧರಿಸಿದೆ.

ಭಾರತದ ಕಂಪೆನಿಗಳ ಮೇಲಿರುವ ಆರೋಪ

• ಫೆಬ್ರವರಿಯಲ್ಲಿ ತಮಿಳುನಾಡು ಮೂಲದ ಗ್ಲೋಬಲ್ ಫಾರ್ಮಾ ಹೆಲ್ತ್‌ಕೇರ್ ಕಂಪೆನಿಯು ತನ್ನ ಕಣ್ಣಿನ ಔಷಧಗಳ ಸಂಪೂರ್ಣ ಉತ್ಪನ್ನಗಳನ್ನು ವಿದೇಶಗಳಿಂದ ವಾಪಸ್ ತರಿಸಿಕೊಂಡಿತ್ತು. ಅದಕ್ಕೂ ಮುನ್ನ ಭಾರತದಲ್ಲಿ ತಯಾರಾದ ಕೆಮ್ಮಿನ ಸಿರಪ್‌ಗಳು ಗಾಂಬಿಯಾದಲ್ಲಿ 66 ಹಾಗೂ ಉಜ್ಬೇಕಿಸ್ತಾನದಲ್ಲಿ 18 ಮಕ್ಕಳ ಸಾವಿಗೆ ಕಾರಣವಾಗಿವೆ ಎಂದು ಕಳೆದ ವರ್ಷ ವಿಶ್ವ ಆರೋಗ್ಯ ಸಂಸ್ಥೆ ವರದಿಗಳು ಆರೋಪಿಸಿದ್ದವು.

ಕೆಮ್ಮಿನ ಔಷಧಿಗಳ ರಫ್ತು

• 2021- 22ರಲ್ಲಿ 17 ಬಿಲಿಯನ್ ಅಮೆರಿಕನ್ ಡಾಲರ್ ಮೊತ್ತದ ಕೆಮ್ಮಿನ ಔಷಧಿಗಳನ್ನು ರಫ್ತು ಮಾಡಿದ್ದ ಭಾರತ, 2022- 23ರಲ್ಲಿ 17.6 ಬಿಲಿಯನ್ ಡಾಲರ್ ಸಿರಪ್‌ಗಳನ್ನು ರಫ್ತು ಮಾಡಿದೆ. ಇಡೀ ಜಾಗತಿಕ ಮಟ್ಟದಲ್ಲಿ ಭಾರತದ ಔಷಧ ಉದ್ಯಮವು ಪ್ರಮುಖ ವೈದ್ಯಕೀಯ ಉತ್ಪನ್ನಗಳ ತಯಾರಕ ಹಾಗೂ ರಫ್ತುದಾರನಾಗಿದೆ.
• ಅಭಿವೃದ್ಧಿ ಹೊಂದಿದ ದೊಡ್ಡ ದೇಶಗಳಿಗೂ ಭಾರತದಿಂದ ಅಪಾರ ಪ್ರಮಾಣದ ಔಷಧಗಳು ರವಾನೆಯಾಗುತ್ತಿದೆ. ಔಷಧ ಉತ್ಪನ್ನಗಳ ಪ್ರಮಾಣದಲ್ಲಿ ಜಾಗತಿಕವಾಗಿ ಭಾರತ 3ನೇ ಹಾಗೂ ಮೌಲ್ಯಗಳಲ್ಲಿ 14ನೇ ಸ್ಥಾನದಲ್ಲಿದೆ.