ಸುದ್ದಿಯಲ್ಲಿ ಏಕಿದೆ? ಮಿದುಳು ತಿನ್ನುವ ಅಮೀಬಾ ಸೋಂಕು ಎಂದು ಕರೆಯಲಾಗುವ ಅಮೀಬಿಕ್ ಮೆನಿಂಗೊಎನ್ಸೆಫಲಿಟಿಸ್(ಈ ಕಾಯಿಲೆಯ ವೈಜ್ಞಾನಿಕ ಹೆಸರು) ಎಂಬ ಕಾಯಿಲೆ ನೆರೆಯ ಕೇರಳ ರಾಜ್ಯದಲ್ಲಿ ಕಂಡುಬಂದಿದೆ.

ಮುಖ್ಯಾಂಶಗಳು

• ಕೇರಳದಲ್ಲಿ ಹೆಚ್ಚು ಕಂಡುಬರಲು ಕಾರಣ: ಕೇರಳದ ಪರಿಸರ ಮತ್ತು ವಾತಾವರಣವು ನೆಗ್ಲೇರಿಯಾ ಫೌಲೆರಿಯ ಬೆಳವಣಿಗೆಗೆ ಪೂರಕವಾಗಿರುವುದರಿಂದ ಈ ಕಾಯಿಲೆ ಹೆಚ್ಚು ವರದಿಯಾಗುತ್ತದೆ. ರಾಜ್ಯದಲ್ಲಿರುವ ಹೆಚ್ಚು ಉಷ್ಣಾಂಶ ಮತ್ತು ತೇವಾಂಶದಿಂದ ಕೂಡಿದ ವಾತಾವರಣ ಅಮೀಬಾದ ಬೆಳವಣಿಗೆಗೆ ಪೂರಕವಾಗಿದೆ.
• ಕೇರಳ ಬಿಟ್ಟರೆ, ಭಾರತದಲ್ಲಿ ಪಶ್ಚಿಮ ಬಂಗಾಳದಲ್ಲಿ ಈ ಕಾಯಿಲೆ ಹೆಚ್ಚು ವರದಿಯಾಗಿದೆ.

ಏನಿದು ವಿವರ

• ಮಿದುಳಿಗೆ ಹಾನಿಮಾಡುವಂತಹ ನೆಗ್ಲೇರಿಯಾ ಫೌಲೆರಿ ಎನ್ನುವ ಹೆಸರಿನ ಪರಾವಲಂಬಿ ಏಕಕೋಶ ಜೀವಿಯಿಂದ ಬರುವ ಸೋಂಕು.
• ಇದು ಸಾಮಾನ್ಯವಾಗಿ ಕಲುಷಿತಗೊಂಡ ಕೆರೆ, ಕುಂಟೆ, ನದಿಗಳ ಬೆಚ್ಚನೆಯ ನೀರಿನಲ್ಲಿ ಅಭಿವೃದ್ಧಿ ಹೊಂದುತ್ತದೆ. ನಿರ್ವಹಣೆಯ ಕೊರತೆ ಇರುವ ಈಜುಕೊಳಗಳಲ್ಲಿಯೂ ಕಂಡುಬರುತ್ತದೆ.
• ಈಜಾಡುವಾಗ, ಮೇಲಿನಿಂದ ನೀರಿನೊಳಗೆ ಧುಮುಕಿದಾಗ ಮತ್ತು ಇತರ ಸಂದರ್ಭ ಗಳಲ್ಲಿ ಮೂಗಿನ ಮೂಲಕ ಮನುಷ್ಯನ ದೇಹ ಪ್ರವೇಶಿಸುತ್ತದೆ
• ಈ ಜೀವಿ ಮಿದುಳಿನ ಜೀವಕೋಶಗಳಿಗೆ ಹಾನಿ ಮಾಡಿ, ಮಿದುಳು ಮತ್ತು ಬೆನ್ನುಹುರಿಯ ಸುತ್ತಲಿನ ಪೊರೆಗಳಲ್ಲಿನ ಉರಿಯೂತ ಮತ್ತು ಮಿದುಳಿನ ಉರಿಯೂತಕ್ಕೆ ಕಾರಣವಾಗುತ್ತದೆ. ಸೋಂಕಿತರಾದವರ ಪೈಕಿ ಶೇ 97 ಮಂದಿ ಜೀವ ಕಳೆದುಕೊಂಡಿದ್ದಾರೆ.
• ಸಾಮಾನ್ಯವಾಗಿ, ಸೋಂಕು ಕಾಣಿಸಿಕೊಂಡ ನಂತರದ 18 ದಿನಗಳ ಒಳಗೆ ಸಾವು ಸಂಭವಿಸುತ್ತಿರುವುದು ಇದುವರೆಗಿನ ಪ್ರಕರಣಗಳ ಸಾಮಾನ್ಯ ಲಕ್ಷಣವಾಗಿದೆ.
• ಈ ಸೋಂಕು ಮೊದಲು ಪತ್ತೆಯಾಗಿದ್ದು ಆಸ್ಟ್ರೇಲಿಯಾದಲ್ಲಿ. ಅಡಿಲೇಡ್ನಲ್ಲಿ 1961–65ರ ಅವಧಿಯಲ್ಲಿ ನಾಲ್ವರು ಈ ಕಾಯಿಲೆಯಿಂದ ಮೃತಪಟ್ಟಿದ್ದರು. ಫೌಲರ್ ಮತ್ತು ಕಾರ್ಟರ್ ಎಂಬುವವರು ಈ ಕಾಯಿಲೆಗೆ ಕಾರಣವಾಗುವ ನೆಗ್ಲೇರಿಯಾ ಫೌಲೆರಿ ಅಮೀಬಾವನ್ನು ಗುರುತಿಸಿದ್ದರು.
• ಈ ಅಮೀಬಾ ಬೆಳವಣಿಗೆಗೆ ತಾಪಮಾನದ ಏರಿಕೆ, ನಿಂತ ಹಾಗೂ ಕಲುಷಿತ ನೀರು, ಜಲಮೂಲಗಳು ಕಲುಷಿತಗೊಳ್ಳುತ್ತಿರುವುದು ಅದಕ್ಕೆ ಮುಖ್ಯ ಕಾರಣ.
• ಈ ಅಮೀಬಾ ಬೆಚ್ಚಗಿನ ನೀರಿನಲ್ಲಿ ಹೆಚ್ಚು ಕ್ರಿಯಾಶೀಲವಾಗಿರುತ್ತದೆ. 40ರಿಂದ 45 ಡಿಗ್ರಿ ಸೆಲ್ಸಿಯಸ್ನಷ್ಟು ಬಿಸಿ ಇರುವ ನೀರಿನಲ್ಲೂ ಇದು ಬದುಕಬಲ್ಲದು. ಉಪ್ಪು ನೀರಿನಲ್ಲಿ ಇದು ಬದುಕುವುದಿಲ್ಲ.
• ಈ ಸೋಂಕು ಸಾಂಕ್ರಾಮಿಕವಲ್ಲ.
• ಅಂಟಾರ್ಕ್ಟಿಕಾ ಬಿಟ್ಟು ಉಳಿದ ಖಂಡಗಳ 33 ರಾಷ್ಟ್ರಗಳಲ್ಲಿ ಈ ಕಾಯಿಲೆ ಕಾಣಿಸಿಕೊಂಡಿದೆ.

ರೋಗ ಲಕ್ಷಣಗಳು ವೈರಲ್ ಜ್ವರದ ಲಕ್ಷಣಗಳು:

ಜ್ವರ, ತಲೆ ನೋವು, ವಾಂತಿ, ಸುಸ್ತು, ಕುತ್ತಿಗೆ ನೋವು ನರಸಂಬಂಧಿ ಲಕ್ಷಣಗಳು: ತೀವ್ರ ತಲೆನೋವು, ಏಕಾಗ್ರತೆಯ ಕೊರತೆ,ಮಾನಸಿಕ ಅಸ್ಥಿರತೆ, ಗೊಂದಲ, ಭ್ರಮಾಧೀನ ಮನಸ್ಥಿತಿ, ಕೋಮಾಗೆ ಜಾರುವುದು

ರೋಗ ಪತ್ತೆ ಹೇಗೆ?

ರೋಗವು 3ರಿಂದ 7 ದಿನಗಳಲ್ಲಿ ಪಕ್ವ ಸ್ಥಿತಿ ಮುಟ್ಟುತ್ತದೆ ಸೋಂಕಿತನ ಸೂಕ್ಷ್ಮ ಪರಿಶೀಲನೆ, ಸೆರೆಬ್ರೊಸ್ಪೈನಲ್ ಫ್ಲೂಯಿಡ್ ಅನಾಲಿಸಿಸ್ (ಸಿಎಸ್ಎಫ್) (ಬೆನ್ನುಹುರಿಯಲ್ಲಿನ ದ್ರವದ ಪರೀಕ್ಷೆ), ಪಾಲಿಮರೇಸ್ ಚೈನ್ ರಿಯಾಕ್ಷನ್ (ಪಿಸಿಆರ್) ಮುಂತಾದ ವಿಧಾನಗಳ ಮೂಲಕ ರೋಗ ಪತ್ತೆ ಮಾಡಲಾಗುತ್ತದೆ.