Published on: October 20, 2021

ವಿಶ್ವ ಚಿನ್ನ ಪರಿಷತ್ ವರದಿ

ವಿಶ್ವ ಚಿನ್ನ ಪರಿಷತ್ ವರದಿ

ಸುದ್ಧಿಯಲ್ಲಿ ಏಕಿದೆ?  ವಿಶ್ವ ಚಿನ್ನ ಪರಿಷತ್ತು, ಭಾರತೀಯ ಚಿನ್ನ ಮಾರುಕಟ್ಟೆಯ ಆಳ – ವಿಸ್ತೃತ ವಿಶ್ಲೇಷಣೆಯ ಸರಣಿಯ ಮೊದಲ ಕಂತಾದ ‘ಭಾರತೀಯ ಚಿನ್ನ ಬೇಡಿಕೆಯ ಚಾಲಕರು ಎಂಬ ವರದಿಯನ್ನು ಬಿಡುಗಡೆಗೊಳಿಸಿದೆ.

ವರದಿಯಲ್ಲಿ ಏನಿದೆ ?

  • ಎಕನೋಮೆಟ್ರಿಕ್‌ ಮಾದರಿಯನ್ನು ಬಳಸಿ ತಯಾರಾಗಿರುವ ಈ ವರದಿ, 1990 ರಿಂದ 2020 ರವರೆಗಿನ ಮೂರು ದಶಕಗಳ ವಾರ್ಷಿಕ ದತ್ತಾಂಶಗಳ ಮೇಲೆ ಬೆಳಕು ಚೆಲ್ಲಿದ್ದು, ಭಾರತದ ಚಿನ್ನದ ಬೇಡಿಕೆಯ ಮೇಲಿನ ಕೆಲ ಪ್ರಮುಖ ಪ್ರಭಾವಗಳ ಕುರಿತು ವಿಶ್ಲೇಷಿಸಿದೆ.
  • ಈ ವರದಿಯು ಪ್ರಮಾಣ ಹಾಗೂ ಗುಣಮಟ್ಟ ಎರಡೂ ದೃಷ್ಟಿಕೋನದಿಂದ ಚಿನ್ನದ ಬೇಡಿಕೆಯನ್ನು ವಿಶ್ಲೇಷಿಸಿದೆ. ಭಾರತದಲ್ಲಿ ದೀರ್ಘಾವಧಿ ಹಾಗೂ ಅಲ್ಪಾವಧಿಯ ಚಿನ್ನದ ಬೇಡಿಕೆಯ ಸಮಗ್ರ ವಿಶ್ಲೇಷಣೆಯ ಜೊತೆಗೆ, ಈ ಬೇಡಿಕೆಯನ್ನು ರೂಪಿಸುವ ಜನಸಂಖ್ಯಾ ಶಾಸ್ತ್ರ, ಸಾಮಾಜಿಕ – ಆರ್ಥಿಕ ಮತ್ತು ಸಂಬಂಧಿಸಿದ ಬೆಳವಣಿಗೆಗಳನ್ನು ಪರಿಶೀಲಿಸುತ್ತದೆ. ಇದು ಭವಿಷ್ಯದ ಬೇಡಿಕೆಯ ಏರುಪೇರಿನ ಮೇಲೆ ಕೂಡ ಬೆಳಕು ಚೆಲ್ಲುತ್ತದೆ.
  • ಆದಾಯದ ಹೆಚ್ಚಳವೇ ದೀರ್ಘಾವಧಿಯಲ್ಲಿ ಚಿನ್ನದ ಬೇಡಿಕೆಯ ಏರಿಕೆಗೆ ಕಾರಣ. ಇದಕ್ಕೆ ದೇಶದ ಸದೃಢ ಜನಸಂಖ್ಯಾ ಶಾಸ್ತ್ರದ ಆರ್ಥಿಕತೆ ಕೂಡ ಪೂರಕವಾಗಿದೆ. ಆದರೂ, ಇಳಿಮುಖವಾಗುತ್ತಿರುವ ಕುಟುಂಬಗಳ ಉಳಿತಾಯ ಮತ್ತು ಕೃಷಿ ಆದಾಯದಿಂದ ಭಾರತದಲ್ಲಿ ಚಿನ್ನದ ಬೇಡಿಕೆ ಅಲ್ಪಾವಧಿಯ ಸವಾಲುಗಳನ್ನು ಎದುರಿಸುತ್ತಿದೆ.
  • ಪ್ರಸ್ತುತ ನೀತಿ ತಯಾರಕರು ಚಿನ್ನದ ಬೇಡಿಕೆಯನ್ನು ಆಮದುಗಳ ದೃಷ್ಟಿಕೋನದ ಮೂಲಕ ಮಾತ್ರ ನೋಡುತ್ತಾರೆ. ಹೆಚ್ಚುವರಿಯಾಗಿ, ಜನರ ನಂಬಿಕೆ ಗಳಿಸಲು ಮತ್ತು ಗ್ರಾಹಕರಲ್ಲಿ ಜಾಗೃತಿ ಮೂಡಿಸಲು ಉದ್ಯಮದ ಪ್ರಯತ್ನಗಳು ಹೆಚ್ಚು ಒಗ್ಗಟ್ಟಾಗಿರಬೇಕು ಎಂದು ವರದಿಯು ಎತ್ತಿ ತೋರಿಸುತ್ತದೆ.

ವಿಶ್ವ ಚಿನ್ನದ ಪರಿಷತ್ತಿನ ಅಭಿಪ್ರಾಯ

  • ಸಾಂಸ್ಕೃತಿಕ ಬಾಂಧವ್ಯ, ದೀರ್ಘಕಾಲದ ಸಂಪ್ರದಾಯ ಮತ್ತು ಹಬ್ಬಗಳಲ್ಲಿ ಉಡುಗೊರೆಗಳು ಮಹತ್ವದ ಪಾತ್ರವನ್ನು ವಹಿಸುತ್ತವೆ. ಇದು ಕಳೆದ ಮೂರು ದಶಕಗಳಲ್ಲಿ ಭಾರತದ ಚಿನ್ನದ ಬೇಡಿಕೆಯನ್ನು ಹೆಚ್ಚಿಸಿದೆ. ಭಾರತದ ಹೂಡಿಕೆದಾರರು ಮನೆಯ ಆದಾಯ, ಚಿನ್ನದ ಬೆಲೆ ಮತ್ತು ಹಣದುಬ್ಬರಗಳಂತಹ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಈ ವರದಿ ಇಂದು ಹಾಗೂ ಭವಿಷ್ಯದಲ್ಲಿ ಚಿನ್ನದ ಬೇಡಿಕೆಯನ್ನು ಅರ್ಥಮಾಡಿಕೊಳ್ಳಲು ಸಹಾಯ ಮಾಡುತ್ತದೆ

ವರದಿಯ ಪ್ರಮುಖ ಅಂಶಗಳು

ಚಿನ್ನದ ದೀರ್ಘಾವಧಿಯ ಗ್ರಾಹಕರ ಬೇಡಿಕೆಗಳ ಮೇಲೆ ಮೂರು ಪ್ರಮುಖ ಅಂಶಗಳು ಪ್ರಭಾವ ಬೀರುತ್ತವೆ.

  • ಆದಾಯ: ಶೇ. 1ರಷ್ಟು ರಾಷ್ಟ್ರೀಯ ತಲಾದಾಯ ಹೆಚ್ಚಳವಾದಲ್ಲಿ ಚಿನ್ನದ ಬೇಡಿಕೆ ಶೇ. 0.9ರಷ್ಟು ಏರಿಕೆಯಾಗುತ್ತದೆ.
  • ಚಿನ್ನದ ದರ: ಚಿನ್ನದ ರೂಪಾಯಿ ಆಧಾರಿತ ಬೆಲೆಯಲ್ಲಿ ಶೇ.1ರಷ್ಟು ಏರಿಕೆಯಾದಾಗ, ಬೇಡಿಕೆ ಶೇ.0.4ರಷ್ಟು ಕಡಿಮೆಯಾಗುತ್ತದೆ.
  • ಸರ್ಕಾರಿ ಸುಂಕಗಳು: ಆಮದು ಸುಂಕ ಮತ್ತು ಇತರ ತೆರಿಗೆಗಳು ದೀರ್ಘಾವಧಿಯ ಬೇಡಿಕೆಯ ಮೇಲೆ ಪರಿಣಾಮ ಬೀರುತ್ತವೆ. ಆದರೆ ಅದು ಚಿನ್ನವನ್ನು ಆಭರಣಗಳು ಅಥವಾ ಬಾರ್‌ಗಳು ಮತ್ತು ಕಾಯಿನ್‌ ಹೀಗೆ ಅದರ ಖರೀದಿಯ ಪ್ರಕಾರವನ್ನು ಆಧರಿಸಿರುತ್ತದೆ.

ಚಿನ್ನದ ಅಲ್ಪಾವಧಿ ಬೇಡಿಕೆಯ ಮೇಲೆ ಪ್ರಭಾವ ಬೀರುವ ಅಂಶಗಳು

  1. ಹಣದುಬ್ಬರ: ಪ್ರಪಂಚದಾದ್ಯಂತದ ಹೂಡಿಕೆದಾರಂತೆಯೇ ಭಾರತೀಯ ಉಳಿತಾಯಗಾರರು ಚಿನ್ನವನ್ನು ಹಣದುಬ್ಬರಕ್ಕೆ ತಡೆ ಎಂದು ಪರಿಗಣಿಸುತ್ತಾರೆ. ಹಣದುಬ್ಬರದಲ್ಲಿ ಪ್ರತಿ ಶೇ.1ರಷ್ಟು ಹೆಚ್ಚಳಕ್ಕೆ ಚಿನ್ನದ ಬೇಡಿಕೆ ಶೇ.2.6ರಷ್ಟು ಹೆಚ್ಚಾಗುತ್ತದೆ.
  2. ಚಿನ್ನದ ಬೆಲೆಯಲ್ಲಿ ಬದಲಾವಣೆ: ನಿರಂತರ ದರದ ಹೆಚ್ಚಳ ಮತ್ತು ಕಡಿತ ದೀರ್ಘಾವಧಿಯ ಬೇಡಿಕೆಯ ಮೇಲೆ ಪರಿಣಾಮ ಬೀರುತ್ತದೆ. ತ್ವರಿತ ದರದ ಬದಲಾವಣೆ ಅಲ್ಪಾವಧಿ ಬೇಡಿಕೆಯ ಮೇಲೆ ಪರಿಣಾಮ ಬೀರುತ್ತದೆ. ಪ್ರತಿ ಶೇ.1ರಷ್ಟು ಚಿನ್ನದ ಬೆಲೆ ಕಡಿತದಿಂದ ಬೇಡಿಕೆ ಶೇ.1.2ರಷ್ಟು ಹೆಚ್ಚಾಗುತ್ತದೆ.
  3. ತೆರಿಗೆ ಅವಧಿ: 2012ರಿಂದ ಆಮದು ಸುಂಕದ ದರದ ಹೆಚ್ಚಳದಿಂದ ಪ್ರತಿ ವರ್ಷ ಚಿನ್ನದ ಬೇಡಿಕೆ ಶೇ.1.2ರಷ್ಟು ಕಡಿಮೆಯಾಗಿದೆ.
  4. ಹೆಚ್ಚುವರಿ ಮಳೆ: ಮುಂಗಾರು ಕೂಡ ಗ್ರಾಹಕರ ವರ್ತನೆಯ ಮೇಲೆ ಪ್ರಭಾವ ಬೀರುತ್ತದೆ. ಶೇ.1ರಷ್ಟು ಮಳೆಯ ಹೆಚ್ಚಳದಿಂದ, ಶೇ.0.2ರಷ್ಟು ಚಿನ್ನದ ಬೇಡಿಕೆ ಹೆಚ್ಚಾಗುತ್ತದೆ.

ಭಾರತದಲ್ಲಿ ಭವಿಷ್ಯದ ಚಿನ್ನದ ಬೇಡಿಕೆಯ ಹೊರನೋಟ

  1. ಈ ವರ್ಷ ಕೋವಿಡ್-19 ಸಾಂಕ್ರಾಮಿಕದ ಸುದೀರ್ಘ ಹೋರಾಟದಿಂದ ದೇಶದಲ್ಲಿ ಚಿನ್ನದ ಬೇಡಿಕೆ ನಿಯಂತ್ರಣದಲ್ಲಿತ್ತು.
  2. ದೇಶಾದ್ಯಂತ ನಿರ್ಬಂಧಗಳು ನಿಧಾನವಾಗಿ ಸಡಿಲಗೊಳ್ಳುತ್ತಿರುವುದರಿಂದ ಆಮದು ಸದೃಢಗೊಳ್ಳುವ ಮತ್ತು ಚಿಲ್ಲರೆ ಮಾರಾಟದ ಬೇಡಿಕೆ ಏರಿಕೆಯ ನಿರೀಕ್ಷೆಯಿದೆ.
  3. 2022ರಲ್ಲಿ ಆರ್ಥಿಕ ಬೆಳವಣಿಗೆ ಮತ್ತು ಬಂಗಾರದ ಬೇಡಿಕೆಯ ಪ್ರಭಾವ ಬಲಗೊಳ್ಳುವ ಸಾಧ್ಯತೆಯಿದೆ. ಆದರೂ ಯಾವುದೇ ಭವಿಷ್ಯದ ಕರೋನಾ ವೈರಸ್ ಸೋಂಕು ಏಕಾಏಕಿ ಮತ್ತಷ್ಟು ಅನಿಶ್ಚಿತತೆಗಳನ್ನು ಸೃಷ್ಟಿಸಬಹುದು.
  4. ಉದ್ಯಮವು ಹೆಚ್ಚು ಪಾರದರ್ಶಕ, ಹೆಚ್ಚು ಪ್ರಮಾಣಿತ ಮತ್ತು ಜಾಗತಿಕ ಸ್ನೇಹಿ ಕ್ರಮಗಳನ್ನು ತೆಗೆದುಕೊಂಡರೆ, ಭಾರತದ ಚಿನ್ನದ ಮಾರುಕಟ್ಟೆಯು ಪ್ರಯೋಜನ ಪಡೆಯುತ್ತದೆ.