ಸುದ್ದಿ - ಸರ್ವೋಚ್ಚ ನ್ಯಾಯಾಲಯದಿಂದ ಪೋಕ್ಸೊ ದೋಷನಿರ್ಣಯ ರದ್ದು ಇತ್ತೀಚೆಗೆ, ಸಂತ್ರಸ್ತೆಯು ಪ್ರಾಪ್ತ ವಯಸ್ಕಳಾದ ಬಳಿಕ ಆರೋಪಿಯನ್ನು ವಿವಾಹವಾಗಿದ್ದಾಳೆ ಎಂಬುದನ್ನು ಗಮನಿಸಿದ ಸರ್ವೋಚ್ಚ ನ್ಯಾಯಾಲಯವು, ಸಂವಿಧಾನದ 142ನೇ ವಿಧಿಯ ಅಡಿಯಲ್ಲಿ ತನ್ನ ಅಸಾಧಾರಣ ಅಧಿಕಾರಗಳನ್ನು ಚಲಾಯಿಸುವ ಮೂಲಕ ಲೈಂಗಿಕ ಅಪರಾಧಗಳಿಂದ ಮಕ್ಕಳ ರಕ್ಷಣಾ ಕಾಯ್ದೆ (POCSO), 2012ರ ಅಡಿಯಲ್ಲಿ ಶಿಕ್ಷೆಗೊಳಗಾದ ವ್ಯಕ್ತಿಯ ದೋಷನಿರ್ಣಯವನ್ನು ರದ್ದುಗೊಳಿಸಿದೆ.
ಪೋಕ್ಸೊ ಕಾಯ್ದೆ 2012 (POCSO Act 2012) ಉದ್ದೇಶ:
- ಲೈಂಗಿಕ ದಾಳಿ, ಲೈಂಗಿಕ ಕಿರುಕುಳ ಮತ್ತು ಅಶ್ಲೀಲ ಚಿತ್ರಣಗಳಿಂದ ಮಕ್ಕಳನ್ನು (18 ವರ್ಷದೊಳಗಿನ) ರಕ್ಷಿಸುವುದು ಹಾಗೂ ಪ್ರಕರಣಗಳನ್ನು ವರದಿ ಮಾಡಲು ಮತ್ತು ವಿಚಾರಣೆ ನಡೆಸಲು ಮಕ್ಕಳ-ಸ್ನೇಹಿ ಕಾರ್ಯವಿಧಾನಗಳನ್ನು ಒದಗಿಸುವುದು ಈ ಕಾನೂನಿನ ಗುರಿಯಾಗಿದೆ.
- 1992ರಲ್ಲಿ ವಿಶ್ವಸಂಸ್ಥೆಯ ಮಕ್ಕಳ ಹಕ್ಕುಗಳ ಒಡಂಬಡಿಕೆಯನ್ನು ಭಾರತವು ಅನುಮೋದಿಸಿದ ಪರಿಣಾಮವಾಗಿ ಈ ಕಾಯ್ದೆಯನ್ನು ಶಾಸನಬದ್ಧಗೊಳಿಸಲಾಯಿತು.
ಪ್ರಮುಖ ಲಕ್ಷಣಗಳು:
- ಲಿಂಗ-ತಟಸ್ಥ ಸ್ವರೂಪ: ಹೆಣ್ಣು ಮತ್ತು ಗಂಡು ಮಕ್ಕಳಿಬ್ಬರೂ ಲೈಂಗಿಕ ದೌರ್ಜನ್ಯಕ್ಕೆ ಬಲಿಯಾಗಬಹುದು ಮತ್ತು ಸಂತ್ರಸ್ತರ ಲಿಂಗವನ್ನು ಲೆಕ್ಕಿಸದೆ ಇಂತಹ ದೌರ್ಜನ್ಯವು ಒಂದು ಅಪರಾಧ ಎಂದು ಈ ಕಾಯ್ದೆಯು ಗುರುತಿಸುತ್ತದೆ.
- ಪೋಕ್ಸೊ ನಿಯಮಗಳು, 2020: ಪೋಕ್ಸೊ ನಿಯಮಗಳು, 2020 ಕಾಯ್ದೆಯ ಅನುಷ್ಠಾನವನ್ನು ಬಲಪಡಿಸುತ್ತವೆ. ಅಲ್ಲದೆ ಮಕ್ಕಳ-ಸ್ನೇಹಿ ಕಾರ್ಯವಿಧಾನಗಳು, ಸಾಂಸ್ಥಿಕ ರಕ್ಷಣೆಗಳು, ಮತ್ತು ವರದಿ ಮಾಡುವಿಕೆ ಹಾಗೂ ವಿಚಾರಣೆಗಾಗಿ ಸೂಕ್ತ ಕಾರ್ಯವಿಧಾನಗಳನ್ನು ಒದಗಿಸುತ್ತವೆ.
- ಸಂತ್ರಸ್ತರ ಗುರುತಿನ ಗೌಪ್ಯತೆ: ಪೋಕ್ಸೊ ಕಾಯ್ದೆ, 2012ರ 23ನೇ ಪ್ರಕರಣವು ಬಾಲ ಸಂತ್ರಸ್ತರ ಗುರುತನ್ನು ಗೌಪ್ಯವಾಗಿಡಬೇಕೆಂದು ಕಡ್ಡಾಯಗೊಳಿಸುತ್ತದೆ. ಮಾಧ್ಯಮ ವರದಿಗಳು ಸಂತ್ರಸ್ತರ ಹೆಸರು, ವಿಳಾಸ ಮತ್ತು ಕುಟುಂಬದ ಮಾಹಿತಿ ಸೇರಿದಂತೆ ಅವರ ಗುರುತನ್ನು ಬಹಿರಂಗಪಡಿಸುವ ಯಾವುದೇ ವಿವರಗಳನ್ನು ಪ್ರಕಟಿಸುವಂತಿಲ್ಲ.
- ಮಕ್ಕಳ ಮೇಲಿನ ದೌರ್ಜನ್ಯ ಪ್ರಕರಣಗಳ ಕಡ್ಡಾಯ ವರದಿ: ಇಂತಹ ಅಪರಾಧಗಳ ಬಗ್ಗೆ ಜ್ಞಾನ ಅಥವಾ ಸಮಂಜಸವಾದ ಅನುಮಾನವನ್ನು ಹೊಂದಿರುವ ವ್ಯಕ್ತಿಗಳು, ಸಂಬಂಧಪಟ್ಟ ಅಧಿಕಾರಿಗಳಿಗೆ ಕಡ್ಡಾಯವಾಗಿ ವರದಿ ಮಾಡಬೇಕೆಂದು 19 ರಿಂದ 22ನೇ ಪ್ರಕರಣಗಳು ಕಟ್ಟುನಿಟ್ಟಾಗಿ ಸೂಚಿಸುತ್ತವೆ.
- ಶಿಕ್ಷೆಗಳು: ಅಪರಾಧದ ತೀವ್ರತೆಯ ಆಧಾರದ ಮೇಲೆ ಶ್ರೇಣೀಕೃತ ಶಿಕ್ಷೆಗಳನ್ನು ಈ ಕಾಯ್ದೆಯು ಸೂಚಿಸುತ್ತದೆ. 2019ರ ತಿದ್ದುಪಡಿಯು ಮಕ್ಕಳ ಮೇಲಿನ ಕೆಲವು ಗಂಭೀರ ಸ್ವರೂಪದ ಲೈಂಗಿಕ ಅಪರಾಧಗಳಿಗೆ ಮರಣದಂಡನೆ ಸೇರಿದಂತೆ ಹೆಚ್ಚು ಕಠಿಣ ದಂಡನೆಗಳನ್ನು ಪರಿಚಯಿಸಿದೆ.