Published on: March 26, 2026

ಭಾರತದ ಅತಿದೊಡ್ಡ ಗರ್ಭಧಾರಣೆಯ ಸಮೂಹ ಅಧ್ಯಯನ – GARBH-INi

ಭಾರತದ ಅತಿದೊಡ್ಡ ಗರ್ಭಧಾರಣೆಯ ಸಮೂಹ ಅಧ್ಯಯನ – GARBH-INi

ಸುದ್ದಿ –  ಕೇಂದ್ರ ಸರ್ಕಾರವು ನವದೆಹಲಿಯ ಇಂಡಿಯಾ ಹ್ಯಾಬಿಟಾಟ್ ಸೆಂಟರ್‌ನಲ್ಲಿ ದಶಕದಷ್ಟು ಹಳೆಯದಾದ ‘ಗರ್ಭಿಣಿ‘ (GARBH-INi) ಕಾರ್ಯಕ್ರಮದ ಫಲಿತಾಂಶಗಳನ್ನು ಪ್ರಕಟಿಸಿದೆ.

  • ಗರ್ಭಿಣಿ (GARBH-INi – Interdisciplinary Group for Advanced Research on Birth Outcomes) ಎಂಬುದು ಜೈವಿಕ ತಂತ್ರಜ್ಞಾನ ಇಲಾಖೆಯ (DBT) ಅಡಿಯಲ್ಲಿ ನಡೆಯುತ್ತಿರುವ ಭಾರತದ ಅತಿದೊಡ್ಡ ಗರ್ಭಧಾರಣೆಯ ಸಮೂಹ ಅಧ್ಯಯನ ಆಗಿದೆ.
  • ಅವಧಿಪೂರ್ವ ಜನನವನ್ನು ಅಧ್ಯಯನ ಮಾಡಲು ಮತ್ತು ಅವಧಿಗೂ ಮುನ್ನ ಹೆರಿಗೆಯ ಅಪಾಯವನ್ನು ಊಹಿಸಲು ಅಗತ್ಯವಿರುವ ಆನುವಂಶಿಕ ಗುರುತುಗಳನ್ನು (Genetic markers) ಪತ್ತೆಹಚ್ಚಲು, ಈ ಕಾರ್ಯಕ್ರಮವು 12,000 ಕ್ಕೂ ಹೆಚ್ಚು ಗರ್ಭಿಣಿಯರನ್ನು ಮೇಲ್ವಿಚಾರಣೆ ಮಾಡುತ್ತದೆ.

ಉದ್ದೇಶ: ಸ್ಥಳೀಯ ಮತ್ತು ಕೃತಕ ಬುದ್ಧಿಮತ್ತೆ (AI) ಆಧಾರಿತ ಪರಿಹಾರಗಳ ಮೂಲಕ ತಾಯಿಯ ಆರೋಗ್ಯವನ್ನು ಸುಧಾರಿಸುವುದು ಮತ್ತು ನವಜಾತ ಶಿಶುಗಳ ಮರಣ ಪ್ರಮಾಣವನ್ನು ಕಡಿತಗೊಳಿಸುವುದು.

ಅನುಷ್ಠಾನ: ನೋಂದಾಯಿತ ಗರ್ಭಿಣಿಯರೊಂದಿಗೆ 2015 ರಲ್ಲಿ ಹಂತ 1 ಪ್ರಾರಂಭವಾಯಿತು; 2021 ರಲ್ಲಿ ಪ್ರಾರಂಭವಾದ ಹಂತ 2 ರಲ್ಲಿ, ಜನನದ ಮೊದಲ 1,000 ದಿನಗಳವರೆಗೆ ಅವರ ಶಿಶುಗಳನ್ನು ಮೇಲ್ವಿಚಾರಣೆ ಮಾಡಲಾಯಿತು.

ಗರ್ಭಿಣಿ-GA2 (Garbhini-GA2): ಇದು ಭಾರತೀಯ ಮಹಿಳೆಯರ ಭ್ರೂಣದ ವಯಸ್ಸನ್ನು (Fetal age) ನಿಖರವಾಗಿ ನಿರ್ಧರಿಸಲು ಐಐಟಿ ಮದ್ರಾಸ್ (IIT Madras) ಮತ್ತು ಟಿಎಚ್ಎಸ್ಟಿಐ (THSTI) ಅಭಿವೃದ್ಧಿಪಡಿಸಿದ ಮೊದಲ ಸ್ಥಳೀಯ ಕೃತಕ ಬುದ್ಧಿಮತ್ತೆ ಮಾದರಿಯಾಗಿದೆ.

ಗರ್ಭಿಣಿ-ದೃಷ್ಟಿ (GARBH-INi-DRISHTI): ಇದು ತಾಯಿ ಮತ್ತು ಮಗುವಿನ ಆರೋಗ್ಯ ಸಂಶೋಧನೆಗಾಗಿ ಸಂಶೋಧಕರಿಗೆ ಜೈವಿಕ ಮಾದರಿಗಳು (Biospecimens) ಮತ್ತು ವೈದ್ಯಕೀಯ ದತ್ತಾಂಶವನ್ನು ಒದಗಿಸುವ ಡೇಟಾ ಹಂಚಿಕೆ ವೇದಿಕೆ ಆಗಿದೆ.