ಸುದ್ದಿ – ಲಕ್ಷಾಂತರ ಮಕ್ಕಳು ಮತ್ತು ವಯಸ್ಕರು ತೀವ್ರ ಅಪೌಷ್ಟಿಕತೆ ಮತ್ತು ಸುಪ್ತ ಹಸಿವನ್ನು (Hidden Hunger) ಎದುರಿಸುತ್ತಿರುವುದು, ಭಾರತದಲ್ಲಿ ಆಳವಾಗಿ ಬೇರೂರಿರುವ ರಾಷ್ಟ್ರೀಯ ಬಿಕ್ಕಟ್ಟನ್ನು ತೋರಿಸುತ್ತದೆ.
ವ್ಯಾಖ್ಯಾನ: ಸುಪ್ತ ಹಸಿವು ಅಥವಾ ಸೂಕ್ಷ್ಮ ಪೋಷಕಾಂಶಗಳ ಕೊರತೆ ಎಂಬುದು ಅಪೌಷ್ಟಿಕತೆಯ ಒಂದು ರೂಪವಾಗಿದೆ. ಇದರಲ್ಲಿ ಒಬ್ಬ ವ್ಯಕ್ತಿಯು ಸಾಕಷ್ಟು ಪ್ರಮಾಣದ ಕ್ಯಾಲೋರಿಗಳನ್ನು ಸೇವಿಸಿದರೂ, ಅವನ ದೇಹಕ್ಕೆ ಅಗತ್ಯವಾದ ಜೀವಸತ್ವಗಳು (vitamins) ಮತ್ತು ಖನಿಜಗಳು (minerals) ದೊರೆಯುವುದಿಲ್ಲ.

ಭಾರತದಲ್ಲಿ ಸುಪ್ತ ಹಸಿವಿನ ಚಿತ್ರಣ:

• ರಾಷ್ಟ್ರೀಯ ಹೊರೆ: ಜಗತ್ತಿನ ಹಸಿವಿನಿಂದ ಬಳಲುತ್ತಿರುವ ಜನಸಂಖ್ಯೆಯಲ್ಲಿ ನಾಲ್ಕನೇ ಒಂದು ಭಾಗದಷ್ಟು ಜನರು ಭಾರತದಲ್ಲಿದ್ದಾರೆ. 190 ಮಿಲಿಯನ್‌ಗೂ ಹೆಚ್ಚು ಜನ ಅಪೌಷ್ಟಿಕತೆಯಿಂದ ಕೂಡಿದ್ದು, ಜಾಗತಿಕವಾಗಿ ಕ್ಷೀಣಿಸುವಿಕೆ ಸಮಸ್ಯೆಯ ಹೊರೆ ಹೊಂದಿರುವವರಲ್ಲಿ ಅರ್ಧದಷ್ಟು ಮಂದಿ ಭಾರತದಲ್ಲಿದ್ದಾರೆ.
• ಮಕ್ಕಳಲ್ಲಿ ಅಪೌಷ್ಟಿಕತೆ: 5 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಸುಮಾರು 35.5% ಮಕ್ಕಳು ಕುಂಠಿತ ಬೆಳವಣಿಗೆಯನ್ನು (ವಯಸ್ಸಿಗೆ ತಕ್ಕ ಎತ್ತರವಿಲ್ಲದಿರುವುದು) ಹೊಂದಿದ್ದಾರೆ ಮತ್ತು 18.7% ಮಕ್ಕಳು ಕ್ಷೀಣಿಸಿದ  (ಎತ್ತರಕ್ಕೆ ತಕ್ಕ ತೂಕವಿಲ್ಲದಿರುವುದು) ಸ್ಥಿತಿಯಲ್ಲಿದ್ದಾರೆ.
• ಹದಿಹರೆಯದವರಲ್ಲಿನ ಕೊರತೆ: ಸುಮಾರು 24% ರಷ್ಟು ಭಾರತೀಯ ಹದಿಹರೆಯದವರು ಕೃಶವಾಗಿದ್ದಾರೆ (ಆರೋಗ್ಯಕರ ದೇಹದ ತೂಕಕ್ಕಿಂತ ಕಡಿಮೆ) ಮತ್ತು ಸುಮಾರು 80% ರಷ್ಟು ಮಂದಿ ಒಂದಕ್ಕಿಂತ ಹೆಚ್ಚು ಸೂಕ್ಷ್ಮ ಪೋಷಕಾಂಶಗಳ ಕೊರತೆಯನ್ನು ಎದುರಿಸುತ್ತಿದ್ದಾರೆ.
• ಲಿಂಗದ ಮೇಲಿನ ಪ್ರಭಾವ: ಮಹಿಳೆಯರು ಮತ್ತು ಮಕ್ಕಳು ಇದರ ದುಷ್ಪರಿಣಾಮಕ್ಕೆ ಹೆಚ್ಚು ಒಳಗಾಗಿದ್ದಾರೆ. NFHS-5 ವರದಿಯ ಪ್ರಕಾರ, 57% ಮಹಿಳೆಯರು ಮತ್ತು 6 ರಿಂದ 59 ತಿಂಗಳ ವಯಸ್ಸಿನ 67% ಮಕ್ಕಳು ರಕ್ತಹೀನತೆಯಿಂದ (anaemic) ಬಳಲುತ್ತಿದ್ದಾರೆ.
• ಪ್ರಮುಖ ರಾಜ್ಯಗಳು: ಗುಜರಾತ್, ಜಾರ್ಖಂಡ್ ಮತ್ತು ಬಿಹಾರ ರಾಜ್ಯಗಳಲ್ಲಿ ಅಪೌಷ್ಟಿಕತೆಯ ಮಟ್ಟವು ರಾಷ್ಟ್ರೀಯ ಸರಾಸರಿಗಿಂತ ಗಮನಾರ್ಹವಾಗಿ ಹೆಚ್ಚಿದೆ.
• ಜಾಗತಿಕ ಹಸಿವಿನ ಸೂಚ್ಯಂಕ (GHI) 2025: ಭಾರತವು 123 ದೇಶಗಳ ಪೈಕಿ 102ನೇ ಸ್ಥಾನದಲ್ಲಿದೆ ಮತ್ತು 25.8 ಸ್ಕೋರ್ ಪಡೆಯುವ ಮೂಲಕ ಹಸಿವಿನ “ಗಂಭೀರ” ವರ್ಗದಲ್ಲಿ ಗುರುತಿಸಲ್ಪಟ್ಟಿದೆ.

ಸುಪ್ತ ಹಸಿವಿನ ಪರಿಣಾಮಗಳು:

• ಪೀಳಿಗೆಯಿಂದ ಪೀಳಿಗೆಗೆ ವರ್ಗಾವಣೆ: ತಾಯಿಯ ಅಪೌಷ್ಟಿಕತೆಯು ಕಡಿಮೆ ತೂಕದ ಮಗುವಿನ ಜನನಕ್ಕೆ (low-birth-weight) ಕಾರಣವಾಗುತ್ತದೆ ಮತ್ತು ಇದು ಪೀಳಿಗೆಯಿಂದ ಪೀಳಿಗೆಗೆ ಪೋಷಕಾಂಶಗಳ ಕೊರತೆಯ ಚಕ್ರವನ್ನು ಆರಂಭಿಸುತ್ತದೆ.
• ಆರಂಭಿಕ ಹಾನಿ: ಮಗುವಿನ ಜೀವನದ ಮೊದಲ 1,000 ದಿನಗಳಲ್ಲಿ ಉಂಟಾಗುವ ಸೂಕ್ಷ್ಮ ಪೋಷಕಾಂಶಗಳ ಕೊರತೆಯು ದೈಹಿಕ ಬೆಳವಣಿಗೆಯಲ್ಲಿ ಶಾಶ್ವತ ನಷ್ಟವನ್ನು ಉಂಟುಮಾಡುತ್ತದೆ ಮತ್ತು ಬೌದ್ಧಿಕ ಬೆಳವಣಿಗೆಯನ್ನು ಶಾಶ್ವತವಾಗಿ ಕುಂಠಿತಗೊಳಿಸುತ್ತದೆ.
• ಉತ್ಪಾದಕತೆಯ ನಷ್ಟ: ದೌರ್ಬಲ್ಯ, ಆಯಾಸ ಮತ್ತು ಆಗಾಗ್ಗೆ ಬರುವ ಕಾಯಿಲೆಗಳು ವಯಸ್ಕರ ಕೆಲಸದ ಸಾಮರ್ಥ್ಯವನ್ನು ಕಡಿಮೆ ಮಾಡುತ್ತವೆ. ಸೂಕ್ಷ್ಮ ಪೋಷಕಾಂಶಗಳ ಅಪೌಷ್ಟಿಕತೆಯಿಂದಾಗಿ ಭಾರತವು ತನ್ನ GDP ಯ ಸುಮಾರು 4% ನಷ್ಟನ್ನು ಕಳೆದುಕೊಳ್ಳುತ್ತಿದೆ.
• ಜನಸಂಖ್ಯಾ ಲಾಭಾಂಶಕ್ಕೆ (Demographic Dividend) ಕುತ್ತು: ಸುಪ್ತ ಹಸಿವು ಯುವಜನರ ಆರೋಗ್ಯ, ಕಲಿಕೆ ಮತ್ತು ಕೌಶಲ್ಯಗಳನ್ನು ದುರ್ಬಲಗೊಳಿಸುತ್ತದೆ ಹಾಗೂ ಭಾರತದ ಜನಸಂಖ್ಯಾ ಲಾಭಾಂಶದ ಉತ್ಪಾದಕ ಸಾಮರ್ಥ್ಯವನ್ನು ಕಡಿಮೆ ಮಾಡುತ್ತದೆ.
• ಆರೋಗ್ಯದ ಹೊರೆ: ಕುಸಿದ ರೋಗನಿರೋಧಕ ಶಕ್ತಿಯು ಸೋಂಕಿನ ಅಪಾಯಗಳನ್ನು ಹೆಚ್ಚಿಸುತ್ತದೆ ಮತ್ತು ಆಸ್ಪತ್ರೆಗೆ ದಾಖಲಾಗುವ ಪ್ರಮಾಣವನ್ನು ಹೆಚ್ಚು ಮಾಡುತ್ತದೆ. ಇದರಿಂದಾಗಿ ಕುಟುಂಬ ಮತ್ತು ಸಾರ್ವಜನಿಕ ಆರೋಗ್ಯ ವೆಚ್ಚಗಳು ಏರಿಕೆಯಾಗುತ್ತವೆ.

ಸುಪ್ತ ಹಸಿವನ್ನು ಎದುರಿಸಲು ಸರ್ಕಾರದ ಕ್ರಮಗಳು:

• ಮಿಷನ್ POSHAN 2.0: ಮೇಲ್ದರ್ಜೆಗೇರಿಸಲಾದ ಅಂಗನವಾಡಿ ಸೇವೆಗಳು ಮತ್ತು ನೈಜ-ಸಮಯದ ಮೇಲ್ವಿಚಾರಣೆಯ ಮೂಲಕ ಮಕ್ಕಳು ಮತ್ತು ತಾಯಂದಿರ ಪೋಷಣೆಯನ್ನು ಸುಧಾರಿಸಲು ‘ಸಕ್ಷಮ್ ಅಂಗನವಾಡಿ’ ಮತ್ತು ‘POSHAN 2.0’ ಜಾರಿಗೆ ತರಲಾಗಿದೆ.
• ಪ್ರಧಾನ ಮಂತ್ರಿ ಪೋಷಣ್ ಶಕ್ತಿ ನಿರ್ಮಾಣ್ (PM Poshan): ಶಾಲಾ ಮಕ್ಕಳಿಗೆ ಬಿಸಿ ಊಟ ಮತ್ತು ಸಾರವರ್ಧಿತ ಅಕ್ಕಿಯನ್ನು (fortified rice) ಒದಗಿಸುವ ಮೂಲಕ ಉತ್ತಮ ಹಾಜರಾತಿ ಮತ್ತು ದೈನಂದಿನ ಪೋಷಣೆಯನ್ನು ಬೆಂಬಲಿಸುತ್ತದೆ.
• ಆಹಾರ ಸಾರವರ್ಧನೆ (Food Fortification): ಅಕ್ಕಿ, ಖಾದ್ಯ ತೈಲ ಮತ್ತು ಉಪ್ಪಿನ ಕಡ್ಡಾಯ ಸಾರವರ್ಧನೆಯು, ಹೆಚ್ಚು ಬಳಕೆಯಾಗುವ ಈ ಆಹಾರ ಪದಾರ್ಥಗಳಿಗೆ ಕಬ್ಬಿನಾಂಶ, ಫೋಲಿಕ್ ಆಸಿಡ್ ಮತ್ತು ಅಗತ್ಯ ಜೀವಸತ್ವಗಳನ್ನು ಸೇರಿಸುತ್ತದೆ.
• ಅನೀಮಿಯಾ ಮುಕ್ತ ಭಾರತ್ (AMB): ರಕ್ತಹೀನತೆಯ ಪ್ರಮಾಣವನ್ನು ತಗ್ಗಿಸಲು ಕಬ್ಬಿನಾಂಶ ಮತ್ತು ಫೋಲಿಕ್ ಆಸಿಡ್ ಮಾತ್ರೆಗಳನ್ನು ಪೂರೈಸಲಾಗುತ್ತದೆ, ನಿಯಮಿತವಾಗಿ ಜಂತುಹುಳು ನಿವಾರಣೆ (deworming) ಮಾಡಲಾಗುತ್ತದೆ ಮತ್ತು ಜಾಗೃತಿಯನ್ನು ಮೂಡಿಸಲಾಗುತ್ತದೆ.
• ಪ್ರಧಾನ ಮಂತ್ರಿ ಮಾತೃ ವಂದನಾ ಯೋಜನೆ (PMMVY): ಗರ್ಭಿಣಿ ಮತ್ತು ಬಾಣಂತಿಯರ ಪೋಷಣೆಯನ್ನು ಬೆಂಬಲಿಸಲು ಮತ್ತು ಭಾಗಶಃ ವೇತನ ನಷ್ಟವನ್ನು ಸರಿದೂಗಿಸಲು ಅವರಿಗೆ ಷರತ್ತುಬದ್ಧ ನಗದು ವರ್ಗಾವಣೆಯನ್ನು ನೀಡಲಾಗುತ್ತದೆ.
• ಈಟ್ ರೈಟ್ ಇಂಡಿಯಾ (Eat Right India): FSSAI ನೇತೃತ್ವದಲ್ಲಿ ಸುರಕ್ಷಿತ ಆಹಾರ ಪದ್ಧತಿಗಳನ್ನು ಉತ್ತೇಜಿಸಲಾಗುತ್ತದೆ ಮತ್ತು ಸಮತೋಲಿತ ಆಹಾರ ಕ್ರಮದ ಬಗ್ಗೆ ದೇಶಾದ್ಯಂತ ಅರಿವು ಮೂಡಿಸಲಾಗುತ್ತದೆ.