ಸುದ್ಧಿಯಲ್ಲಿ ಏಕಿದೆ ? ಜನವರಿಯಿಂದ ಹೈಕೋರ್ಟ್‌ಗಳಲ್ಲಿ ಪ್ರಕರಣಗಳ ಇ-ಫೈಲಿಂಗ್‌ ಕಡ್ಡಾಯಗೊಳಿಸುವ ಮೂಲಕ ಸರ್ವೋಚ್ಚ ನ್ಯಾಯಾಲಯ, ಇ-ಕೋರ್ಟ್‌ಗಳ ಸ್ಥಾಪನೆಯತ್ತ ದಿಟ್ಟ ಹೆಜ್ಜೆಯಿಟ್ಟಿದೆ.

ಸರ್ವೋಚ್ಚ ನ್ಯಾಯಾಲಯ ಏನು ಹೇಳಿದೆ ?

• ಸಮಯ ಹಾಗೂ ಕಾಗದ ಉಳಿತಾಯ ಮಾಡುವ ಈ ಪರಿಸರಸ್ನೇಹಿ ವ್ಯವಸ್ಥೆ ಈಗಾಗಲೇ ಕೋವಿಡ್‌ ಕಾಲಘಟ್ಟದಲ್ಲಿ ಅತ್ಯಂತ ಪರಿಣಾಮಕಾರಿ ವಿಧಾನವೆಂದು ಸಾಬೀತಾಗಿದೆ. ಈ ಹಿನ್ನೆಲೆಯಲ್ಲಿ ಸರ್ವೋಚ್ಚ ನ್ಯಾಯಾಲಯ, ಎಲ್ಲ ಹೈಕೋರ್ಟ್‌ಗಳಿಗೆ ಇ-ಫೈಲಿಂಗ್‌ ವಿಧಾನ ಕಡ್ಡಾಯಗೊಳಿಸುವಂತೆ ಆದೇಶಿಸಿದೆ. ಅದರಲ್ಲೂ ವಿಶೇಷವಾಗಿ ಮೊದಲನೇ ಹಂತದಲ್ಲಿ ಸರಕಾರಗಳ ಕೇಸ್‌ಗಳನ್ನು, ತೆರಿಗೆ ಸಂಬಂಧಿ ಪ್ರಕರಣಗಳನ್ನು ಇ-ಫೈಲಿಂಗ್‌ ಮೂಲಕವೇ ಮಾಡಬೇಕೆಂದು ತಾಕೀತು ಮಾಡಿದೆ
• ಕೋರ್ಟ್‌ಗಳನ್ನು ಕಾಗದ ರಹಿತಗೊಳಿಸುವ ನಿಟ್ಟಿನಲ್ಲಿ ಇದು ಮೊದಲನೇ ಹೆಜ್ಜೆಯಾಗಿದೆ. ಆ ಮೂಲಕ ನ್ಯಾಯಾಂಗದಲ್ಲಿ ಡಿಜಿಟಲೀಕರಣಕ್ಕೆ ನಾಂದಿ ಹಾಡಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಇ-ಕೋರ್ಟ್‌ಗಳ ಸ್ಥಾಪನೆಗೆ ಇದು ರಹದಾರಿಯಾಗಲಿದೆ.
• ಮೊದಲ ಹಂತದಲ್ಲಿ ಇ-ಫೈಲಿಂಗ್‌ ಹೈಕೋರ್ಟ್‌ಗಳಿಗೆ ಕಡ್ಡಾಯವಾಗಿದ್ದು, ಮುಂದಿನ ಹಂತಗಳಲ್ಲಿ ಅದು ಜಿಲ್ಲಾ ಮತ್ತು ತಾಲೂಕು ಕೋರ್ಟ್‌ಗಳಿಗೆ ವಿಸ್ತರಣೆಯಾಗಲಿದೆ.

ಕರ್ನಾಟಕದಲ್ಲಿ ಮೊದಲೇ ಆರಂಭ

• ಇ-ಫೈಲಿಂಗ್‌, ಹೈಬ್ರಿಡ್‌ ವಿಡಿಯೊ ಕಾನ್ಫರೆನ್ಸ್‌ ಸೇರಿದಂತೆ ತಂತ್ರಜ್ಞಾನ ಅಳವಡಿಕೆ ವಿಚಾರದಲ್ಲಿ ಕರ್ನಾಟಕವು ದೇಶದ ಇತರ ಹೈಕೋರ್ಟ್‌ಗಳಿಗಿಂತ ಮುಂದಿದೆ. ರಾಜ್ಯದಲ್ಲಿ 2020ರ ಜೂನ್‌ ತಿಂಗಳಲ್ಲಿ ಕೋವಿಡ್‌ ಸಂಕಷ್ಟದ ನಡುವೆಯೇ ಅಂದಿನ ಸಿಜೆ ಎ.ಎಸ್‌. ಓಕ್‌ ಒತ್ತಾಸೆಯಂತೆ ಇ-ಫೈಲಿಂಗ್‌ ಆರಂಭಿಸಲಾಗಿದೆ. ಹೈಕೋರ್ಟ್‌ ಈಗಾಗಲೇ ಇ-ಫೈಲಿಂಗ್‌ಗೆ ಪ್ರತ್ಯೇಕ ನಿಯಮಗಳನ್ನು ರೂಪಿಸಿ ಅವುಗಳನ್ನು ಜಾರಿಗೊಳಿಸಲು ಮುಂದಾಗಿದೆ.

ಏನಿದು ಇ-ಫೈಲಿಂಗ್‌?

• ಪ್ರಸ್ತುತ ಬಹುತೇಕ ತಳಮಟ್ಟದ ತಾಲೂಕು ಕೋರ್ಟ್‌ಗಳಿಂದ ಹಿಡಿದು ಸುಪ್ರೀಂ ಕೋರ್ಟ್‌ವರೆಗೆ ಎಲ್ಲ ನ್ಯಾಯಾಲಯಗಳಲ್ಲಿ ಫಿಸಿಕಲ್‌ ಫೈಲಿಂಗ್‌, ಅಂದರೆ ಕೇಸಿನ ವಿವರಗಳ ಅರ್ಜಿಯನ್ನು ಕಾಗದದ ರೂಪದಲ್ಲಿ ದಾಖಲೆಗಳು, ಮನವಿ, ವಕಾಲತ್ತು ಸೇರಿ ಎಲ್ಲ ವಿವರಗಳ ಪ್ರಿಂಟ್‌ ತೆಗೆದು ಅದನ್ನು ಸಲ್ಲಿಸುವ ವಿಧಾನ ಬಳಕೆಯಲ್ಲಿದೆ. ಆದರೆ, ಅದರಿಂದ ಫೈಲಿಂಗ್‌ಗೆ ಹೆಚ್ಚು ಸಮಯ ಹಿಡಿಯುವುದಲ್ಲದೆ, ಹೆಚ್ಚು ಕಾಗದ ಖರ್ಚಾಗಿ ಪರಿಸರದ ಮೇಲೂ ಪರಿಣಾಮ ಬೀರುತ್ತಿದೆ.
• ಇ-ಫೈಲಿಂಗ್‌ ಅಂದರೆ ಕೇಸುಗಳ ಅರ್ಜಿಯನ್ನು ಭೌತಿಕವಾಗಿ ಸಲ್ಲಿಸುವ ಬದಲು ಇ-ವಿಧಾನದ ಮೂಲಕವೇ ಸಲ್ಲಿಸುವುದು. ಇನ್ನು ಸರಳವಾಗಿ ಹೇಳುವುದಾದರೆ ಕಾಗದ ಪತ್ರಗಳನ್ನು ಪ್ರಿಂಟ್‌ ತೆಗೆಯುವ ಬದಲು, ಸಾಫ್ಟ್‌ ಕಾಪಿ ಅಂದರೆ ಪಿಡಿಎಫ್‌ ಮಾಡಿ ನಿಗದಿತ ವೆಬ್‌ಸೈಟ್‌ನಲ್ಲಿ ನಿರ್ದಿಷ್ಟ ವಿಧಾನದಲ್ಲಿ ಅಪ್‌ಲೋಡ್‌ ಮಾಡುವುದು. ಈ ವಿಧಾನದಲ್ಲಿ ಕೇಸ್‌ಗಳ ಫೈಲಿಂಗ್‌ಗೆ ವಕೀಲರು ಅಥವಾ ಅವರ ಕ್ಲರ್ಕ್ ಗಳು ಕೋರ್ಟ್‌ಗೆ ಹೋಗಬೇಕಾಗಿಲ್ಲ, ಗಂಟೆಗಟ್ಟಲೆ ಕಾಯಬೇಕಾಗಿಲ್ಲ. ಕುಳಿತಲ್ಲಿಯೇ ಕೆಲವೇ ನಿಮಿಷಗಳಲ್ಲಿ ಅರ್ಜಿ ಸಲ್ಲಿಸಬಹುದು.